Chantalle

Miene naam is Chantalle Brankaert-Suijkerbuijk, gebaore op 12 juni 1981 in ’t ziekenhoes van Zitterd, maar daezelfde daag thoes gekomme in ôs dörpke Buchten!

Ich ben getrouwd mit eine van Wieërt en same höbbe veer 2 kenjer, Daan en Fenna, wo ich apetrots op ben.
In mien dagelijks laeve wirk ich es leerkracht op de Parksjool in Lömmerich. Hie geneet ich van t wirke mit speciale kenjer…. heel biezunjer!

In miene vrieje tied sjpeel ich gaer toneel of maak ich muziek. Maar ich doon auch gaer zjwumme. Master zjwumme in ’t Anker… kapotmakerie… maar waal leuk 😉

In 1989 ben ich, es klein schanulleke, bie Fanfare St. Jozef van Buchten gegange. Hie sjpeel ich bugel (nae…. ’t is gein trompet 🤣!!!)

Ich höb versjillende jaore bie de 4 buurte Revue (later de Buchter Revue) gesjpeeld en hiedoor ben ich in 2001-2002 door mien tant (Jeanny) en Mia Roebroek (de “mooder” van Blitz) gevraog of ich neet wol oethelpe bie Blitz. Dat jaor höb ich 2 rollen moage dubbelen. De rol es hysterisch maedje dat bang waar veur zjwarte katten en nummer 13 en de rol van paspop…. jao… PASPOP!!! Dit waas misjien waal de moeilijkste rol ooit. Ich werd op un kerke euver de bühne gereeje en mien erm en bein werde in de meest rare houdingen geplaatst… en lol dat men hou, want ich mocht neet bewaege… op ein moment nao. En dao waar ich zo op gefocust dat ich Marcel, ein van de taegesjpelers, zo hel op zien henj paafde dat men dat achter in de zaal heurde en t handj van Marcel veurrood waar en hae zich achter un blaedje moosj versjtoppe om ziene lach te verberge 😂🙈

2015 waar un heel biezonjer toneeljaor. Veer höbbe dat jaor mit 4 sjpelers un sjtuk op de planke gebracht… heel intensief, maar ruig!!

T leukste sjtuk tot noe toe, wo ich in gesjpeeld höb, venj ich t sjtuk van aafgelaope jaor (2017-2018)… d’r in d’r oet. Waat höbbe veer dao gelachen en genaote, zowel in de veurbereidingen es bie de oetveuringen! Veer es sjpelers same mit uch es publiek… Heerlijk….
Unne daag neet gelache is unne daag neet gelaefd!